Saarländischer Mundartpreis (Foto: SR)

"Dabber niwwer"

Saarländischer Mundartpreis 2019: Raimund Eich - 2. Preis Prosa

  22.11.2019 | 22:00 Uhr
2. Preis Prosa Raimund Eich (2 v.r.) (Foto: Pasquale D'Angiolillo)
2. Preis Prosa Raimund Eich (2 v.r.)

„Dabber niwwer“, hadder zu ma gesahd, „ich will jo ned of mei letschd Schichd ze schbähd komme.“

Mir ware friejer mol zesamme in de Volksschuhl, bis isch no vier Johr of die Middelschuhl gang bin. Er hädd die Volksschuhl ferdischgemacht unn währ dann of die Grub gang, hadder ma vazehlt.

„Ei, of de Grub war ich ah, awwer nur fünfehalb Jahr.“

„Ach du liewe Zeid, das ich jo garnix“, hadder gemennt. „Bei mir senns iwwer fünfedreisisch Johr, knabb sechsedreisisch, awwer die kriehn ich nemmeh ganz voll gemacht. Immer im Abbau, unn die letzschde siwwe Johr hann ich die Schrähmmaschiehn gefahr. Unn was haschd du gemacht, die paar Jährscher?“

„Ei, ich hodd in Reden Elektrischer gelehrt unn noch zwä Johr iwwer Dah geschaffd. Unn dann bin isch schdudiere gang.“

„Ach näh, e feiner Herr, der nix schaffe wolld“, hadder gesahd unn mich ganz blehd angeguggd.

„Heer mol, ich hann in meim Läwe schon genau so viel geschaffd wie du“, hann isch gesahd.

Do hadder laud ahngefang se lache. „Heer of, e alder Schaffschuhverschdeggeler bischde. Von dene laafe aach of de Grub genuhch erum, awwe nemmeh lang. In e paar Johr mache se im Saarland iwwerall de Deggel droff. Dann is Schischd im Schachd, fa immer.“

„Jo, das glahb isch aah. Wie ald bischde dann jetzt eischendlich.“

„Knabb fuffzisch“, hadder gesahd.

„Unn do gehschd du schon in Rende? Isch muss beschdimmd noch fuffzeh Johr gehn.“

 „Selwer Schuld, wärschde mol wie isch ahch of de Granahd geblieb. Awwer jetzd muss ich werklich dabber niwwer, mei Bus kommd grahd um die Egg.“

Unn dann isser dabber niwwer unn in de Bus ingeschdieh, unn zugewunk hadder ma noch.

Knabb zwäh Johr schbäder hann ich sei Dodesanzeisch gelähs unn se meiner Frah gezeid.

„Ach Gott, de Hans“, hadd se gesahd. „Ei der hat sich awwer mol dabber niwwer gemachd.“

Raimund Eich, Neunkirchen


Artikel mit anderen teilen


Push-Nachrichten von SR.de
Benachrichtungen können jederzeit in den Browser Einstellungen deaktiviert werden.

Datenschutz Nein Ja